Van poder presentase llargumetraxes o curtiumetraxes, de ficción o non ficción, con un valor creativu singular

Los creadores o empreses audiovisuales interesaos van poder presentar los sos proyectos hasta’l 15 d´agostu

02/08/2022.- Llaboral Cinemateca abre una convocatoria nueva del Programa de patrocinios pa proyectos cinematográficos asturianos, nun apueste nuevu pol desenvolvimientu y fortalecimientu del sector audiovisual de la rexón. Esta iniciativa tien como oxetivu lligar y asociar la imaxe de Llaboral Cinemateca cola industria audiovisual d’Asturies gracies a la participación como patrocinador nel desenvolvimientu de proyectos cinematográficos de valor creativu singular que se faigan nel Principáu. Llaboral Cinemateca ye l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.

El programa ta empobináu a los profesionales y creadores asturianos o con residencia nel Principáu d’Asturies qu’incluyan nel so oxetu social la creación y producción cinematográfica, que van poder presentar llargumetraxes o curtiumetraxes enmarcaos tanto na categoría de ficción como na de non ficción. Queden escluyíos los trabayos de calter publicitariu, promocional o periodísticu. Namás se va valorar un proyectu por persona o empresa solicitante.

Nesta convocatoria nueva va escoyese un máximu de dos proyectos na categoría de Llargumetraxes —con una cantidá, tamién máxima, de 14.900 euros por propuesta— y dos proyectos na categoría de Curtiumetraxes que van recibir un máximu de 3.000 euros caún. Na selección de los proyectos va valorase la calidá artística y técnica del trabayu, la orixinalidá y el riesgu de la propuesta, y la participación significativa d’equipu técnicu y actores asturianos. Amás, va tenese en cuenta la viabilidá técnica y artística del proyectu en rellación colos medios de los que se dispón, xunto a otros criterios sociales.

Na web de Llaboral Cinemateca www.laboralcinemateca.es tán disponibles les bases completes d’esta convocatoria y el formulariu de solicitú qu’ha presentase, cumplimentáu afayadizamente y xunto a tola documentación riquío, al traviés de la dirección de corréu electrónicu info@laboralcinemateca.es primero del 15 d´agostu del 2022.

Descargar les bases completes equí.

Descargar la resolución equí.